زیورخ ۔22 ڈسمبر (سیاست ڈاٹ کام ) فٹبال کی عالمی گورننگ باڈی فیفا نے رواں سال منعقدہ ورلڈ کپ کے نشریاتی اعدادوشمار جاری کردیے جس کے مطابق اس سال ورلڈ کپ کو دنیا کی آدھی سے زائد آبادی نے دیکھا۔ ورلڈکپ 14 جون تا 15 جولائی روس میں منعقد ہوا تھا جسے ساڑھے 3 ارب سے زائد شائقین (3.572 ارب) نے دیکھا ۔ دنیا بھر میں رواں سال 3.2 ارب عوام نے ٹی وی فٹبال ورلڈ کپ کو دیکھا جبکہ 30 کروڑ 97 لاکھ افراد نے گھر کے بجائے ریسٹورنٹ، بار یا دیگر عوامی مقامات پر میچ دیکھنے کو ترجیح دی جس سے ورلڈ کپ دیکھنے والوں کی تعداد میں 9.5 فیصد اضافہ دیکھنے میں ہوا ہے ۔ اعدادوشمار کے مطابق 15 جولائی کو کروشیا اور فرانس کے درمیان منعقدہ ورلڈ کپ فائنل کو دنیا بھر میں مجموعی طور پر 1.12 ارب عوام نے دیکھا۔ ورلڈ کپ میں مجموعی طور پر 64 میچ کھیلے گئے جس میں براہ راست میچ دیکھنے والوں کی اوسط تعداد 19 کروڑ 10 لاکھ تھی۔
