جوہانسبرگ ۔ 4اکٹوبر(سیاست ڈاٹ کام) عمران طاہر کی ہیٹ ٹرک اور ڈیل اسٹین کی آل راؤنڈ کارکردگی کی بدولت جنوبی افریقہ نے زمبابوے کو دوسرے ونڈے میچ میں یکطرفہ مقابلے کے بعد 120 رنز سے شکست دے کر تین مقابلوں کو ونڈے سیریز میں 2-0 کی سبقت بنالی ہے۔جنوبی افریقہ نے ٹاس جیت کر پہلے بیٹنگ کا فیصلہ کیا جو تباہ کن ثابت ہوا اور 101 رنز پر 7 جنوبی افریقی کھلاڑی پویلین لوٹ چکے تھے۔ لیکن اس موقع پر ڈیل اسٹین زمبابوین بولروں کی راہ میں حائل ہو گئے اور انڈیل فلکوایو کے ہمراہ 8 ویں وکٹ کے لیے 75رنز کی شراکت قائم کر کے اپنی ٹیم کی بہتر مجموعے تک رسائی یقینی بنائی۔جنوبی افریقہ کی پوری ٹیم 48ویں اوور میں 198رنز بنا کر ڈھیر ہو گئی۔ڈیل اسٹین 60، ایڈن مرکرم 35 اور فلکوایو 28رنز بنا کر نمایاں رہے۔ایک آسان ہدف کے تعاقب میں زمبابوے کی ٹیم ڈیل اسٹین کی عمدہ بولنگ کے سبب 26 رنز پر ہی دو وکٹوں سے محروم ہو گئی۔ تاہم اسکی بیٹنگ کی تباہی کا اصل آغاز اس وقت ہوا جب عمران طاہر بولنگ کا آغاز کیا اور انہوں نے اپنے چھ اوورز میں ہی زمبابوے کی بیٹنگ کی بساط لپیٹ دی۔ طاہر نے اس دوران شان ولیمز، پیٹر مور اور برینڈن مووٹا کو لگاتار تین گیندوں پر آؤٹ کر کے ونڈے کرکٹ میں ہیٹ ٹرک کرنے کا اعزاز حاصل کر لیا۔زمبابوے کی پوری ٹیم 24اوورز میں 78رنز بنا کر ڈھیر ہو گئی اور اس تباہی کے ذمے دار عمران طاہر تھے جنہوں نے صرف 24 رنز کے عوض 6 وکٹیں حاصل کیں جبکہ دو وکٹیں ڈیل اسٹین کے نام رہیں۔ زمبابوے کپتان ہملٹن مساکاڈزا 27رنز بنا کر سب سے کامیاب باؤلر رہے جبکہ ٹیم کے آٹھ کھلاڑی دہرے ہندسے میں بھی داخل نہ ہو سکے۔ 721 دن کے طویل وقفے کے بعد پہلا ون ڈے میچ کھیلنے والے اسٹار جنوبی افریقی بولر ڈیل اسٹین کو 60 رنز کی دلکش اننگز اور 2 وکٹیں لینے پر میچ کا بہترین کھلاڑی قرار دیا گیا۔
