ڈھاکہ۔16 ڈسمبر (سیاست ڈاٹ کام ) بنگلادیش کے ونڈے کپتان مشرفی مرتضیٰ نے کہا ہے کہ وہ چاہ کر بھی عمران خان جیسا مقام حاصل نہیں کرسکتے۔ مشرفی مرتضیٰ اس مرتبہ بنگلہ دیش کے انتخابات میں حکمران عوامی لیگ کی جانب سے حصہ لے رہے ہیں، انہوں نے سابق عظیم کرکٹر اور موجودہ پاکستانی وزیراعظم کے حوالے سے کہاکہ حقیقت تو یہ ہے کہ جس مقام پر عمران خان پہنچے ہیں وہاں پر لوگ چاہ کر بھی نہیں پہنچ سکتے، میری خواہش صرف چیریٹی اورکھیلوں کیلئے کچھ کرنے کی ہے، میں اپنے حلقہ انتخاب کی بہتری کیلئے کام کروں گا۔سیاست میں داخلے لینے والے بنگلادیشی ونڈے کپتان مشرفی مرتضیٰ کے ورلڈ کپ کے بعد سبکدوش ہونے کی افواہیں زور پکڑی ہیں اورکچھ حلقوں کا کہنا ہے کہ ویسٹ انڈیز کے خلاف تیسرے میچ کی صورت میں مشرفی اپنے ملک میں آخری ون ڈے کھیل چکے ہیں،آئندہ برس انگلینڈ میں مقررہ ورلڈ کپ سے قبل اب کپتان اپنے گھریلو میدانوں پر کوئی بین الاقوامی ونڈے نہیں کھیلیں گے۔ مشرفی مرتضیٰ نے کہاکہ میں ورلڈ کپ کے بعد کیاکروں گا اس کا فیصلہ میگا ایونٹ میں اپنی ٹیم کے آخری میچ کے بعد سناؤں گا۔
