کراچی۔7 اگسٹ(سیاست ڈاٹ کام)پاکستان کرکٹ بورڈ (پی سی بی) نے 19۔2018 سیزن کے لیے 33 کھلاڑیوں کو نیا سینٹرل کنٹریکٹ دینے کا اعلان کردیا ہے جس میں کھلاڑیوں کے ماہانہ معاوضے اور میچ فیس میں نمایاں اضافہ کیا گیا ہے۔پی سی بی اور کھلاڑیوں کے درمیان 3 سالہ مالیاتی فارمولا ترتیب دیا گیا تھا اور 18۔2017 کے مالی سال کے اختتام کے ساتھ ہی وہ ختم ہوگیا تھا۔بورڈ نے مختلف زمروں میں کھلاڑیوں کے ماہانہ معاوضے میں 25 تا 30 فیصد اضافہ کیا ہے جبکہ تمام زمروں کے لیے میچ فیس میں بھی 20 فیصد اضافہ کیا گیا ہے۔اس سلسلے میں معاہدے میں دوسرے اور تیسرے سال کے دوران ایک مخصوص شرح سے کھلاڑیوں کے معاوضے اور میچ فیس میں اضافے کی بھی منظوری دی گئی ہے۔پی سی بی نے ڈومیسٹک سطح پر عمدہ کارکردگی کا مظاہرہ کرنے والے کھلاڑیوں کی حوصلہ افزائی کے لیے ایک نیا زمرہ ’’ای‘‘ کا اعلان کیا ہے تاکہ نئے اور باصلاحیت کھلاڑیوں کی ہمت افزائی ہوسکے۔نئے سینٹرل کنٹریکٹ میں تجربہ کار محمد حفیظ اے زمرے میں جگہ بنانے میں ناکام رہے اور مستقل ناقص کارکردگی اور بولنگ ایکشن کے مسائل کے باعث انہیں بی زمرے میں شامل کردیا گیا ہے اور بابر اعظم پہلی مرتبہ اے زمرے میں جگہ بنانے میں کامیاب رہے۔ڈوپ ٹسٹ مسائل اور خراب فارم کا شکار احمد شہزاد سینٹرل کنٹریکٹ حاصل نہ کر سکے جبکہ عمر اکمل لگاتار دوسرے سال سینٹرل کنٹریکٹ حاصل کرنے والے کھلاڑیوں کی فہرست میں جگہ نہ بنا سکے۔فخر زمان، شاداب خان اور فہیم اشرف کو عمدہ کارکردگی پر بی زمرے میں شامل کیا گیا ہے جبکہ مستقل زخمی ہونے والے عماد وسیم کو ایک درجہ تنزلی کے بعد سی زمرے میں شامل کیا گیا ہے۔مجموعی طور پر اے اور بی زمرے میں 6، 6، سی زمرے میں 9، ڈی میں 5 اور ای زمرے میں 7 کھلاڑی شامل ہیں۔جن کھلاڑیوں کو سینٹرل کنٹریکٹ دینے کا اعلان کیا گیا ہے ان میں اے زمرے میںسرفراز احمد، اظہر علی، شعیب ملک، یاسر شاہ،محمد عامر اور بابر اعظم۔ بی زمرے میں محمد حفیظ، فہیم اشرف، اسد شفیق، حسن علی، فخر زمان اور شاداب خان۔زمرے سی میںمحمد عباس، وہاب ریاض، جنید خان، حارث سہیل، امام الحق، محمد نواز، عثمان خان شنواری، شان مسعود اور عماد وسیم۔ ڈی زمرے میں رومان رئیس، آصف علی، راحت علی، عثمان صلاح الدین اور حسین طلعت۔ای زمرے میںسعد علی، بلال آصف، محمد رضوان، شاہین شاہ آفریدی، صاحبزادہ فرحان، عمید آصف اور میر حمزہ شامل ہیں۔
