کراچی ۔12 نومبر (سیاست ڈاٹ کام ) چیئرمین پاکستان کرکٹ بورڈ احسان مانی نے ہندوستان کو سٹہ بازوں کا گڑھ قرار دیتے ہوئے کہا ہے کہ میچ اور اسپاٹ فکسنگ کرکٹ کیلئے بڑا خطرہ ہے۔ ہندوستان سٹہ بازوں کی بڑی مارکیٹ ہے۔ آئی سی سی اور ہندوستان کرکٹ بورڈز سٹہ بازوں کو قابو کرنے میں ناکام ہیں۔ سٹہ بازوں کو پکڑنا بی سی سی آئی کا نہیں، قانونی اداروں کا کام ہے۔ مانی نے کہا کہ میں پاکستان کرکٹ بورڈ میں ایک روپے کی کرپشن برداشت نہیں کروں گا اپنے ایک انٹرویو میں احسان مانی نے مزید کہا کہ پی سی بی میں 900 سے زائد ملازمین ہیں، ملازمین کے اعتبار سے دنیا کا سب سے بڑا بورڈ ہے، اس لئے ہمیں بورڈ کے نظام اور گورننس میں بہتری لانا ہوگی۔ چیئرمین بنا تو بورڈ کا ماحول بہت اچھا نہیں تھا، بورڈ میں عملہ کا حوصلہ گرا ہوا تھا، لوگوں کے فون ٹیپ ہونے کی اطلاعات تھیں۔ گڈ گورننس کے تحت نجم سیٹھی کی تفصیلات جاری کیں، اب اپنے اخراجات کی رپورٹ بھی پیش کروں گا، نجم سیٹھی نے نوٹس بھیجا تھا، سچائی سامنے آجائے گی۔ چیئرمین پی سی بی نے کہاکہ نجم سیٹھی کے الزامات بے بنیاد ہیں، سابق کھلاڑیوں کی رائے ضروری ہے۔ انہوں نے کہا کہ پی ایس ایل کا بورڈ الگ ہونا چاہئے۔ سوپر لیگ کے آغاز میں کنٹریکٹ طریقہ کار کے تحت نہیں دیے۔ غیرملکی کھلاڑیوں کو زبردستی پاکستان نہیں لاسکتے، سوپرلیگ اچھا برانڈ ہے، ملک میں انٹرنیشنل کرکٹ بہت ضروری ہے۔ ورلڈ کپ 2019 ء میں ٹیم کی قیادت سرفراز احمدہی کریں گے۔
