ماسکو۔19 جون (سیاست ڈاٹ کام) ورلڈ کپ فٹ بال 2018 کے پانچویں دن پہلے مقابلے میں سویڈن نے جنوبی کوریا کو 0۔1 سے، دوسرے مقابلے میں بیلجیم کی ٹیم نے پاناما کو 0۔3 کے واضح فرق سے اور انگلینڈ نے تیونس کو 2۔0 سے شکست دے کر 3 قیمتی نشانات اپنے نام کرلئے ہیں۔روس میں رواں ورلڈ کپ کے گروپ ایف کے مقابلے میں سویڈن اور جنوبی کوریا کی ٹیمیں مدمقابل ہوئیں جہاں سویڈن نے 12 سال بعد ورلڈکپ کا آغاز کامیابی کے ساتھ کیا۔دونوں ٹیموں کے درمیان پہلے ہاف کا کھیل بغیر کسی گول کے برابر رہا۔سویڈن کے گرینکویسٹ نے دوسرے ہاف میں کھیل کے 65 ویں منٹ میں فری کک کے ذریعے گول کر کے اپنی ٹیم کو برتری دلادی جو کامیابی کے لیے کافی ثابت ہوئی۔جنوبی کوریا کی جانب سے ہوانگ ہیچن کی جانب سے آخری لمحات میں گول کرنے کی کوشش کی تاہم وہ اس میں کامیاب نہ ہوسکے۔خیال رہے کہ گروپ ایف میں گزشتہ روز میکسیکو نے دفاعی چمپیئن جرمنی کو 0۔1 سے شکست دے کر حیران کر دیا تھا جس کے بعد میکسیکو تین نشانات حاصل کیے اور اب سویڈن بھی تین نشانات کے ساتھ سرفہرست ہے۔دوسرے میچ میں بیلجیم نے رومیلو لوکاکو کی شاندار کارکردگی کی بدولت پاناما کو 0۔3 سے شکست دے دی۔بیلجیم کی جانب سے پہلا گول 47 ویں منٹ میں میرٹینز نے اسکورکیا جس کو لوکاکو نے دوسرے ہاف میں دوگنا اور پھر جیت کو یقینی بنا دیا۔لوکاکو نے میچ کے 69 اور 75 ویں میں شاندار گول کر کے اپنی ٹیم کو نہ صرف کامیابی دلادی بلکہ نشانات کی فہرست میں پہلے مقام پر پہنچادیا۔واضح رہے کہ بیلجیم اور پاناما کے درمیان گروپ جی کا پہلا میچ تھا جس کے بعد دوسرے میچ میں انگلینڈ نے تیونس کو سنسنی خیز مقابلے کے بعد 2۔1 سے شکست دے دی۔انگلینڈ کی جانب سے دونوں گول کپتان ہیری کین نے کی جبکہ تیونس کی جانب سے ساسی نے واحد گول فری کک کے ذریعے کیا۔
