دبئی۔26اگست ( سیاست ڈاٹ کام ) آئی ایم ایف نے سعودی عرب سے کہا ہے کہ وہ خام تیل کی قیمتوں میں اضافہ کے تناظر میں اخراجات اور تنخواہوں میں اضافے کو کنٹرول کرے۔آئی ایم کی حالیہ رپورٹ کے مطابق سعودی عرب سے کہا گیا ہے کہ وہ خام تیل کی قیمتوں میں حالیہ اضافے کو دیکھ کر اضافی اخراجات کو کنٹرول کرے اس کے علاوہ تنخواہوں میں اضافے کا سلسلہ بھی روکا جائے کیونکہ تیل کے نرخوں میں کسی غیر متوقع گراوٹ کے باعث اس کے قومی بجٹ کو شدید بحران کا سامنا کرنا پڑ سکتا ہے۔آئی ایم ایف کا کہنا ہے کہ اخراجات میں کمی کیلئے ملازمین کی تعداد کو بھی کم کیا جاسکتا ہے۔ سعودی میں اس وقت 12.8 فیصد افراد بیروزگار ہیں جبکہ خواتین میں بیروزگاری کا تناسب 31 فیصد سے زیادہ ہوچکا ہے۔ملک کیلئے بڑا چیلنج آئندہ پانچ سال کے دوران روزگار کے 5 لاکھ سے زیادہ مواقع پیدا کرنا ہے تاہم اس کیلئے نجی شعبے پر توجہ کرنے کو کہا گیا ہے۔یاد رہے کہ روس اور تیل برآمدکرنے والے ملکوں کی تنظیم اوپیک کے درمیان تیل کی پیداوار میں کمی کے حوالے سے2016 میں ہونے والے معاہدے کے تحت خام تیل کے نرخوں میں اضافہ ہوا۔
