کولمبو۔ 4 مئی (سیاست ڈاٹ کام ) انگلینڈ اور ویلز میں ہونے والے کرکٹ ورلڈ کپ کے لئے سری لنکا کے وزارت سیکیورٹی ڈویژن (ایم ایس ڈی) کے 3 عہدیدارسری لنکا کے ٹیم کے ساتھ جائیں گے۔خیال رہے کہ 22 اپریل کو ایسٹر کے موقع پر سری لنکا میں دہشت گردی کا واقعہ رونما ہوا تھا جس کے بعد سری لنکا نے اپنی ٹیم کے لیے اضافی سیکیورٹی کا اقدام کیا۔ رپورٹ کے مطابق سری لنکا کے وزیرکھیل ہارن فارننڈو نے کہا ہے کہ سری لنکا کرکٹ نے اضافی سیکیورٹی کی خصوصی درخواست کی تھی اور ہم نے ایم ایس ڈی کے بہترین عہدیداروں کومنتخب کیا ہے۔ انہوں نے کہا کہ آئی سی سی نے پہلے ہی سیکیورٹی کی یقین دہانی کروائی ہے اور یہ عہدیدار ان کے ساتھ کام کریں گے، جبکہ آئی سی سی نے کہا ہے کہ انہیں سری لنکن کرکٹ کی درخواست منظور کرنے میں کوئی مسئلہ نہیں کیونکہ یہ وقت نہیں کہ غیر ضروری خطرات کا سامنا کیا جائے۔ خیال رہے کہ اس سے قبل آئی سی سی کے کسی بھی ٹورنمنٹ میں سری لنکا کی کرکٹ کی جانب سے ایسا اقدام سامنے نہیں آیا اور سری لنکن کرکٹ نے ہمیشہ ٹورنمنٹ کے میزبان ملک کی جانب سے ملنے والی سیکیورٹی پر انحصار کیا ہے۔ دہشت گرد حملوں کے بعد سری لنکائی ٹیم کی جانب سے تیاریوں کا دوبارہ آغاز چند روز قبل ہوا جبکہ 7 مئی کو وہ انگلینڈ کے لیے روانہ ہو گی اور یکم جون کو ٹیم نیوزی لینڈ کے خلاف پہلا میچ کھیلے گی۔
سری لنکائی ٹیم کی کِٹ کی رونمائی
کولمبو۔ 4 مئی (سیاست ڈاٹ کام) ورلڈ کپ کے لئے سری لنکا کرکٹ نے اپنی ٹیم کی کٹ کی رونمائی کر دی۔ ٹیم کے لیے متعارف کروائی گئی کٹ کی خاص بات یہ ہے کہ اس میں ری سائیکلڈ پلاسٹک کا استعمال کیا گیا ہے۔
