بلغراط 18 مارچ (سیاست ڈاٹ کام) سربیائی فوج نے بلغراط میں واقع اپنے ہیڈکوارٹرس میں مسلم سپاہیوں کے لئے اپنی پہلی مسجد قائم کی ہے۔ چیف آف جنرل اسٹاف لوبیسا دیکووچ کے علاوہ سربیائی اسلامی برادری کے سربراہ آدم زلکچ اور مفتی بلغراط محمد یوسف اسپاہچ نے جنرل اسٹاف بلڈنگ میں تعمیر شدہ مسجد کی افتتاحی تقریب میں حصہ لیا۔
آدم زلکچ نے کہاکہ یہ اِس بات کی علامت ہے کہ سربیا جمہوری راستہ پر گامزن ہے۔ قبل ازیں نوی پازار شہر میں بھی سربیائی فوج میں شامل مسلم سپاہیوں کی سہولت کے لئے ایک مسجد کا افتتاح عمل میں لایا گیا۔ سربیائی کی 71 لاکھ آبادی میں تقریباً 2,20,828 یعنی 3.1 فیصد مسلمان ہیں۔ آرتھوڈکس عیسائیوں کے اکثریتی ملک سربیا میں اسلام تیسرا بڑا مذہب ہے۔