سڈنی ۔3 اکٹوبر (سیاست ڈاٹ کام ) پاکستانی سابق فاسٹ بولر اورکپتان وقار یونس نے کہا ہے کہ روہت شرما نے ایشیا کپ کے دوران ویراٹ کوہلی کی غیرموجودگی میں جس طرح ٹیم کی قیادت کی وہ قابل تعریف ہے۔ خلیجی اخبار کو دیئے گئے انٹرویو میں وقار یونس نے کہا ہے کہ دیکھیں کوہلی ، کوہلی ہے، آپ اسے چیلنج نہیں کرسکتے،لیکن میں سمجھتا ہوں کہ کوہلی کے بغیر بھی ہندوستانی ٹیم نے ایشیا کپ میں بہترین کارکردگی دکھائی ہے۔ کوہلی نمبر 3 پر عمدہ بیٹنگ کرتے ہیں لیکن ٹورنمنٹ میں روہت شرما نے کوہلی کے بغیر بھی شاندار کارکردگی کا مظاہرہ کیا ہے، وہ بہت تحمل مزاج ہے ، ہرگزرتے دن اْن کی کپتانی میں نکھار آرہا ہے، میں نے آئی پی ایل میں بھی روہت کی کپتانی دیکھی ہے، وہ لوگوں کو اپنے فیصلے خود کرنے کا موقع دیتاہے۔ وقار یونس نے ہندوستانی اوپنرس کی بھی تعریف کی اور کہا ہے کہ ٹیم بہت پروفیشنل ہے، اس کے پاس عالمی معیار کے اوپنرز ہیں اور حریف ٹیم کے لئے بہت مشکل ہوجاتا ہے جب روہت اور دھون اننگز کا آغاز کریں اور ہر مرتبہ آپ کو اچھی شراکت داری دیں۔
