نیویارک ۔11 جون (سیاست ڈاٹ کام ) فٹبالر میدان میں تو اپنے جوہر دکھاتے ہی ہیں لیکن یورپ کی تجارتی مارکیٹ میں کرسٹیانو رونالڈو نے بڑے بڑوں کو پیچھے چھوڑ دیا ہے۔ امریکی کمرشل اشاعتی ادارے کے مطابق یورپ کے کمرشل ترین کھلاڑی پرتگالی فٹبال اسٹار کرسٹیانو رونالڈو ہیں جنہوں نے پروفیشنل کیرئیر میں ہی نہیں بلکہ تشہیر میں بھی یورپ کے تمام کھلاڑیوں کو پیچھے کردیا ہے۔عالمی سطح پر 83 فیصد لوگ رونالڈو کو بخوبی جانتے ہیں۔ اسپانسر شپ کے لئے دنیا کی سرفہرست کمپنیاں رونالڈو پر 67 فیصد بھروسہ کرتی ہیں۔ سوپراسٹار اسٹرائیکر اسی مد میں سالانہ 30 سے 35 ملین یورو کماتے ہیں۔ 19.35 گلوبل پوائنٹس کمی کے ساتھ انگلش فٹبالر وائن رونی دوسرے نمبر پر ہیں اور اس فہرست میں یہ واحد انگلش پلیئر ہیں۔بارسلونا کے اسپینی فٹبال پلیئر اینڈریاس اینیسٹا 21.34 نشانات کی کمی کے بعد تیسرے مقام پر قبضہ جمائے ہوئے ہیں۔ ریال میڈرڈ کے مہنگے ترین اسٹرائیکر گیراتھ بیل کا کمرشل کھلاڑیوں میں نواں نمبر ہے۔ حریف ٹیم کی ڈی میں تابڑ توڑ حملے کرنے والے لیونل میسی کمرشل مارکیٹ کی فہرست کے ٹاپ ٹین میں بھی شامل نہیں ہیں۔
