کراچی ۔ 18اکٹوبر(سیاست ڈاٹ کام ) پاکستانی سابق لیگ اسپنر دانش کنیریا نے 6سال تک مسلسل انکار کے بعد بالآخر میچ فکسنگ میں ملوث ہونے کا اعتراف کرلیا۔اس فکسنگ اسکینڈل میں انگلش کاؤنٹی ایسیکس کے باؤلر مروین ویسٹ فیلڈ کو جیل کی ہوا بھی کھانی پڑی تھی۔ قطر ٹی وی الجزیرہ کے تحقیقاتی یونٹ کو انٹرویو دیتے ہوئے دانش کنیریا نے اپنے سابق ساتھی کرکٹرز سے ندامت کا اظہار کرتے ہوئے معافی مانگی اور کرکٹ حکام سے اپنے اوپر لگائی گئی تاحیات پابندی ختم کرنے کی درخواست بھی کی۔ انٹرویو کا آغاز دانش کنیریا نے ان الفاظ سے کیا کہ ’میرا نام دانش کنیریا ہے اور میں اعتراف کرتا ہوں کہ 2012 میں انگلینڈ اور ویلز کرکٹ بورڈ کی جانب سے مجھ پر لگائے گئے الزامات درست تھے۔ تہلکہ خیز انٹرویو میں دانش کنیریا نے اعترافی بیان دیتے ہوئے کہا کہ میں اب اتنا مضبوط ہوں کہ یہ فیصلہ کر سکوں کیونکہ آپ زندگی جھوٹ کے ساتھ نہیں گزار سکتے۔ کنیریا نے مزیدکہا کہ 6 سال قبل ان الزامات سے انکار کرنے کی ایک وجہ ان کے والد تھے جو اس وقت کینسر کی بیماری میں مبتلا تھے اور بعد ازاں اپریل 2013 میں زندگی کی بازی ہار گئے۔ پاکستان کی نمائندگی کرنے پر میرے والد مجھ پر بہت فخر کرتے تھے، اس لیے میرے اندر اتنا حوصلہ نہیں تھا کہ اپنی غلطی تسلیم کرنے کے بعد ان کا سامنا کر سکوں۔ انہوں نے اپنا آخری ٹیسٹ 2010 میں کھیلا ۔ انٹرویو میں پشیمانی کا اظہار کرتے ہوئے انہوں نے کہا کہ میں پاکستان کا سب سے زیادہ وکٹیں حاصل کرنے والا بولر تھا اور اچھا معاوضہ بھی حاصل کر رہا تھا لیکن میں نے سب کچھ کھو دیا، اپنے دوست، اپنے مداحوں سے ملی ہوئی محبت و احترام، سب کچھ۔
