استنبول،3نومبر (سیاست ڈاٹ کام) سعودی عرب کے مقتول صحافی جمال خشوگی کے قتل کے بعد ترکی اور سعودی عرب کے درمیان کشیدگی بڑھتی جارہی ہے ۔ترک صدر رجب طیب اردغان نے سعودی عرب سے مطالبہ کیا ہے کہ صحافی جمال خشوگی کے قتل کے ذمہ داروں کو ہمارے حوالے کیا جائے تاکہ ترک سرزمین میں ان کا ٹرائل ہوسکے ۔خبر رساں ایجنسی اے ایف پی کی رپورٹ کے مطابق جی 20 سربراہی اجلاس کے بعد بیونس آئرس میں صحافیوں سے گفتگو کرتے ہوئے طیب اردغان نے کہا کہ‘‘ان افراد کا ترکی میں ٹرائل ہونا ضروری ہے تاکہ عالمی برادری کے پاس کوئی سوال ہے تو اس کو ختم کیا جائے ’’۔طیب اردغان نے کہا کہ‘‘جس کسی نے بھی حکم دیا اور اس پرتشدد ظلم پر عمل کیا اس کو ایک مرتبہ آشکار ہونا چاہیے ، سہولت کاروں کو واضح نہیں کیا گیا تو پوری دنیا اور مسلمان برادری مطمئن نہیں ہوگی’’۔ترک صدر نے کہا کہ سعودی حکام نے خشوگی کی لاش کی موجودگی اور خشوگی کے قتل کے لیے آنے والے اسکواڈ کے سہولت کاروں کی شناخت کے حوالہ سے ترک تفتیش کاروں سے تعاون کرنے سے انکار کیا تھا۔
