ٹوکیو، 12 مارچ (سیاست ڈاٹ کام) جاپان نے کرکٹ کے میدان میں ایک نہیں بلکہ چار قدم آگے بڑھتے ہوئے انگلینڈ کی کرکٹ ٹیم کو میچ کھیلنے کا چیلنج کرڈالا ہے۔ اگر یہ کہا جائے کہ انگلینڈ اپنی کرکٹ کی تاریخ کے بدترین دور سے گزر رہا ہے تو بے جا نہ ہو گا کیونکہ ورلڈ کپ 2015ء میں پے درپے ناکامیوں کے بعد جاپان کرکٹ اسوسی ایشن نے بھی موقع سے فائدہ اٹھاتے ہوئے انگلینڈ کی ٹیم کو ملک کے دورے کی دعوت دے ڈالی۔ بنگلہ دیش سے انتہائی اہم میچ ہارنے کے بعد جاپان کرکٹ اسوسی ایشن نے ٹوئٹر پر انگلش کرکٹ بورڈ (ای سی بی) کے نام اپنے پیغام میں کہا کہ اگر اس کے شیڈول میں گنجائش ہے تو کیوں نہ آسٹریلیا سے روانگی کے بعد انگلینڈ اور جاپان کے درمیان ایک میچ ہو جائے۔ واضح رہے کہ ورلڈ کپ کے تین مرتبہ فائنل کھیلنے والی انگلش ٹیم کو ورلڈ کپ 2015ء میں بدترین کاکردگی کی وجہ سے سخت تنقیدوں کا سامنا ہے۔ اوئن مورگن زیرقیادت انگلش ٹیم کو ایونٹ کے پہلے ہی میچ میں آسٹریلیا کے مقابل 111 رنز کی شکست کے بعد اسے نیوزی لینڈ اور سری لنکا نے بھی ناکامی سے دوچار کیا۔ اس کے بعد انھیں اسکاٹ لینڈ کی کمزور ٹیم کے خلاف کامیابی ملی۔ تاہم بنگلہ دیش کے خلاف عبرتناک شکست کے ساتھ انگلش ٹیم ورلڈ کپ کیلئے مسابقت سے باہر ہو گئی، حالانکہ اب بھی انھیں ایک لیگ میچ افغانستان سے کھیلنا ہے۔
