برلن ، 13 مئی (سیاست ڈاٹ کام) اسپینی فٹبال کلب بارسلونا کی ٹیم چار برس کے وقفے کے بعد یورپی چمپینس لیگ مقابلوں کے فائنل میں پہنچنے میں کامیاب رہی ہے۔ بارسلونا کو منگل کو جرمنی میں بائرن میونخ کے خلاف سیمی فائنل کے دوسرے مرحلے میں شکست ہوئی لیکن وہ دونوں مراحل میں زیادہ گول کرنے کی بنیاد پر فائنل میں پہنچی۔ یہ 2011ء کے بعد پہلا موقع ہے کہ بارسلونا چمپینس لیگ کا فائنل کھیلے گی۔ 6 جون کو برلن میں مقررہ فائنل میں اس کا مقابلہ روایتی حریف اور ڈیفنڈنگ چمپینس رئیل میڈرڈ یا اطالوی کلب یووینٹس سے ہوگا، جو چہارشنبہ کو دوسرے سیمی فائنل میں کھیل رہے ہیں۔ میونخ میں منگل کی شب منعقدہ میچ میں مقامی ٹیم بائرن میونخ نے 3-2 سے فتح پائی لیکن پہلی لیگ میں 3-0 کی شکست کی وجہ سے وہ گول فرق کی اساس پر ٹورنمنٹ سے باہر ہوگئی۔ بائرن کی جانب سے پہلا گول میدہی بیناتیا نے میچ کے 7 ویں منٹ میں کر دیا۔ تاہم آٹھ منٹ بعد ہی بارسلونا کے برازیلی اسٹرائیکر نیمار نے لوئی سواریز کے پاس پر گول کر کے میچ برابر کردیا۔ نیمار نے 29 ویں منٹ میں ایک اور گول کر کے بارسلونا کو برتری دلوا دی جو پہلے ہاف کے اختتام تک قائم رہی۔ دوسرے ہاف میں بائرن کی جانب سے رابرٹ لیوندوسکی اور ٹامس ملر نے مزید دو گول کئے اور اپنی ٹیم کو میچ میں فتح تو دلوا دی لیکن اسے فائنل تک پہنچانے میں ناکام رہے۔ بارسلونا کی ٹیم 2006ء، 2009ء اور 2011ء میں گزشتہ تین مواقع پر جب بھی چمپینس لیگ کے فائنل میں پہنچی فتح یاب رہی ہے۔ 2015ء میں بارسلونا اسپینی فٹبال کے دو مرکزی ٹورنمنٹس لالیگا اور کوپا ڈیل رے جیت چکی ہے اور چمپینس لیگ میں فتح کی صورت میں ’ٹریبل‘ مکمل کرنے میں کامیاب رہے گی۔
