ماسکو۔16 جولائی(سیاست ڈاٹ کام) فیفا ورلڈ کپ 2018 کے فائنل میں فرانس نے کروشیا کو شکست دے کر عالمی چیمپیئن بننے کا اعزاز حاصل کیا اور فرانس کے نوجوان سوپراسٹارکائلیان ایمباپے نے 60 سال قدیم عالمی ریکارڈ بھی برابر کردیا۔ماسکو کے لزنیکی اسٹیڈیم میں فرانس نے کروشیا کو دلچسپ مقابلے کے بعد شکست دے کر فٹبال کا نیا شہنشاہ بننے کا اعزاز حاصل کر لیا تاہم اس میچ میں نوجوان ایمباپے نے بھی منفرد اعزاز حاصل کر لیا۔فرانس کے کائلیان ایمباپے نے میچ کے65 ویں منٹ میں اپنی ٹیم کے لیے چوتھا گول اسکور کر کے کروشیا کی عالمی کپ کے فائنل میں واپسی کی تمام تر امیدوں پر پانی پھیر دیا۔اس گول کے ساتھ ہی ایمباہے ورلڈ کپ کے فائنل میں گول کرنے والے دوسرے کم عمر ترین کھلاڑی کے ساتھ ساتھ یہ اعزاز حاصل کرنے والے دوسرے نوجوان بھی بن گئے۔ورلڈ کپ کے فائنل میں گول کرنے والے سب سے کم عمر کھلاڑی عظیم برازیلین اسٹار پلے ہیں جنہوں نے 17سال 249 دن کی عمر میں گول اسکور کیا جبکہ ایمباپے 19سال 207 دن کی عمر میں گول کر کے دوسرے کم عمر ترین کھلاڑی بن گئے جس نے عالمی کپ کے فائنل میں گول کیا ہو۔اس گول کے ساتھ ہی فرانسیسی کھلاڑی 60سال میں پہلے نوجوان کھلاڑی ہیں جنہوں نے فیفا ورلڈ کپ کے فائنل میں گول کیا ہو جہاں اس سے قبل یہ منفرد اعزاز بھی پلے کو حاصل تھا جنہوں نے 1958 ورلڈ کپ کے فائنل میں گول کیا تھا۔
