قاہرہ۔ 6 مئی (سیاست ڈاٹ کام) مصر میں 32 مختلف سیاسی جماعتوں اور 41 سماجی گروپوں نے ایتھوپیا میں مصر مخالف ایرانی سرگرمیوں پر گہری تشویش کا اظہار کرتے ہوئے خبردار کیا ہے کہ ایران، ایتھوپیا اور مصر کے درمیان طے پائے معاہدوں کو ناکام بنانے کی سازشیں کررہا ہے۔ مصر کی درجنوں سیاسی اور سماجی تنظیموں کے نمائندہ اتحاد ’’ الاستقلال‘‘ کے صدرنشین احمد الفضالی نے میڈیا سے گفتگو کرتے ہوئے کہا کہ ایتھوپیا میں ایرانی سرگرمیاں مصر کی قومی سلامتی کے لیے سنگین خطرہ ہیں۔ حال ہی میں یہ اطلاعات بھی منظرعام پر آئی ہیں کہ ایران ایتھوپیا اورمصر کے درمیان تعلقات بگاڑنے کی سازشیں کررہا ہے۔ انہوں نے کہا کہ مصری انٹیلی جنس اداروں کو معلوم ہوا ہے کہ تہران ایتھوپیا میں سرمایہ کاری کی آڑ میں نہ صرف مداخلت کی کوشش کررہا ہے بلکہ مصر اور ایتھوپیا کے درمیان تعلقات کو بگاڑنے کی سازشوں میں سرگرم ہے۔ اگر ایران اپنی سازشوں میں کامیاب رہتا ہے تو مصر کی آبی سیکیورٹی کو ناقابل تلافی نقصان پہنچ سکتا ہے۔ ایتھوپیا میں ایران کا بڑھتا اثر ونفوذ خطے کے دیگر عرب ممالک کے ساتھ تعلقات پر بھی اثر انداز ہوسکتا ہے۔
