لندن ۔ /9 ستمبر (سیاست ڈاٹ کام) ہندوستان کے خلاف پانچواں ٹسٹ کھیلتے ہوئے انگلینڈ کے کھلاڑی جیمس انڈرسن پر امپائر کے فیصلہ پر اعتراض اور ناراضگی کے اظہار پر میاچ کی فیس کا پندرہ فیصد جرمانہ عائد کیا گیا ۔ جرمانہ کے علاوہ اس تیز گیند باز پر ان کے ڈسپلن ریکارڈ میں ایک پوائنٹ بطور ان کی خامی کے درج کیا جائے گا اور یہ پہلا موقع ہے کہ ایک کھلاڑی کو ستمبر 2016 ء کے نظرثانی شدہ کوڈ کے مطابق یہ سزا تجویز کی گئی ہے ۔ یہ واقعہ ہفتہ کو انڈین اننگز کھیلنے کے دوران پیش آیا جبکہ کوہلی کو باؤلنگ کرتے ہوئے ان کو ایل بی ڈبلیو آؤٹ قرار نہ دینے کے امپائر کمار دھرما سینا کے فیصلہ کو انہوں نے قبول کرنے سے انکار کردیا ۔ انہوں نے اپنی ٹوپی اور جمپر کو نکال کر امپائر کے خلاف غم و غصہ کرتے ہوئے بعض ناشائستہ ریمارکس کئے اور جارحانہ طریقہ سے ان کے ساتھ پیش آئے تھے ۔ ان کے خلاف آئی سی سی کوڈ آف کنڈکٹ کی دفعہ 2.1.5 کی خلاف ورزی کا الزام لگاکر ان پر جرمانہ عائد کیا گیا ۔
