لکھنو ۔ 27 جون ۔( سیاست ڈاٹ کام ) ایودھیامیں رام مندر کی تعمیر کے لئے ہندو لیڈروں اور سنتوں کے دباؤ والی کوششوں کے پیش نظر آل انڈیا مسلم پرسنل لا بورڈ نے 15 جولائی کو ندوۃ میں مجلس عاملہ کی ایک میٹنگ طلب کر لی ہے جس میں ایودھیااور خواتین کے امور سمیت متعلقہ معاملات زیر غور آئیں گے ۔ہر چند کہ اس میٹنگ میں ایودھیاکے معاملے پر سپریم کورٹ کے فیصلے کی پابندی کے پرانے موقف کی تائید متوقع ہے لیکن اس نشست میں 2019 ء کے عام انتخابات کے پیش نظر سیاسی اور معاشرتی ماحول اور ان کے تقاضوں پر بھی غور کیا جا سکتا ہے ۔بورڈ کے رکن مولانا خالد راشد فرنگی محلی نے آج یہاں بتایا کہ بورڈ کی مجلس عاملہ کی میٹنگ 15 جولائی کو ہوگی۔ انہوں نے کہا کہ یہ میٹنگ معمول کا حصہ ہے اور وقتا ًفوقتاً ہوتی رہتی ہے ۔ اس بار بھی اس میں کئی امور زیر غور آئیں گے جن میں ایودھیاکا معاملہ بھی شامل ہوگا۔ خواتین کے امور میں طلاق ثلاثہ بھی زیر غور رہیگا۔کہا جا رہا ہے اس میٹنگ میں مولانا سید سلمان ندوی کو بورڈ بدر کرنے کے فیصلے کو واپس لیا جا سکتا ہے ۔ بورڈ کے کسی ذمہ دار نے بہرحال اس کی تصدیق نہیں کی۔ مولانا ندوی کو اسی سال فروری میں بورڈ کے حیدرآباد اجلاس میں اس لئے بورڈ بدر کر دیا گیا تھا کہ وہ ایودھیاتنازعہ کو ماورائے عدالت ختم کرنے کی کھل کر تائید کرنے لگے تھے اور اس محاذ پر وہ شری شری روی شنکر کے ساتھ بھی چل پڑے تھے ۔
