ریاض ، 22 اکٹوبر (سیاست ڈاٹ کام) سعودی عدالت نے افغانی اور قطری باشندوں سمیت 13 افراد کو سزائے قید سنائی ہے۔ ان افراد کو امریکی افواج پر حملے کی ایک سازش کا حصہ قرار دیتے ہوئے 18 ماہ سے 30 سال تک کی قید کی سزا سنائی گئی ہے۔ سزا یافتگان کا تعلق القاعدہ سے بتایا گیا ہے۔ ان کے بارے میں کہا گیا ہے کہ انہوں نے دہشت گردی کا ایک سیل قائم کر رکھا تھا۔ یہ افراد قطر میں امریکی افواج پر گرینیڈز، راکٹوں اور دوسرے ہتھیاروں سے حملہ کرنے کا ارادہ رکھتے تھے۔ یہ بھی بتایا گیا ہے کہ ان کے منصوبے میں کویت میں موجود امریکی افواج پر بھی حملے کا منصوبہ شامل تھا۔ اس گروپ نے یہ بھی اسکیم بنائی تھی کہ کس طرح چند لوگوں کو عراق بھیج کر کار بم دھماکوں کی تربیت حاصل کی جائے تاکہ غیر ملکی فوجیوں کو نشانہ بنایا جا سکے۔ سعودی عرب کی انسداد دہشت گردی کے مقدمات کو نمٹانے والی عدالت نے ان 13 افراد میں شامل قطری شہری کو 30 سال قید کی سزا دی ہے، جبکہ افغان دہشت گرد کو پانچ سال قید کی سزا سنائی گئی ہے۔
