کابل ۔22 اپریل (سیاست ڈاٹ کام ) افغانستان نے ورلڈ کپ کے لیے اپنے اسکواڈ کا اعلان کردیا اور سینئر کھلاڑیوں کے اعتراض کے باوجود اسکواڈ کی قیادت گلبدین نائب کریں گے۔ اسکواڈ میں 31 سالہ فاسٹ بولر حامد حسن کی واپسی ہوئی ہے جنہوں نے آخری ونڈے جون 2016 میں کھیلا تھا لیکن اس کے باوجود وہ ٹیم میں جگہ بنانے میں کامیاب رہے۔2 ماہ قبل اصغر افغان کو قیادت سے ہٹانے اورگلبدین نائب کو قیادت دینے پر سینئر کھلاڑیوں محمد نبی اور راشد خان نے شدید تنقید کی تھی لیکن افغانستان کرکٹ بورڈ نے اس کے باوجود گلبدین کو کپتان برقرار رکھا ہے۔ 15 رکنی اسکواڈ کا اعلان جنوبی افریقہ میں ٹریننگ کیمپ کے بعد کیا گیا جہاں علی خیل، کریم جنت اور سید شیرزاد اسکواڈ میں جگہ نہ بنا سکے تاہم انہیں محفوظ کھلاڑیوں کے طور پر رکھا گیا ہے۔ آئرلینڈ کے خلاف ونڈے میچز کھیلنے والے اسکواڈ کے 4 کھلاڑی ٹیم میں جگہ نہیں بنا سکے ان کھلاڑیوں میں اسپنر ظاہر خان، شاہ پور زدران، فرید احمد اور جاوید احمدی شامل ہیں۔ سلیکشن کمیٹی نے کہا کہ اسکواڈ کو گزشتہ 6 ماہ کی فٹنس اور کارکردگی کی بنیاد پر منتخب کیا گیا اور ٹورنمنٹ کی طوالت کو دیکھتے ہوئے شہزاد کے لئے دوسرے وکٹ کیپر اکرام کو منتخب کیا گیا ہے۔ چیف سلیکٹر دولت خان احمد زئی نے کہا کہ ہمیں چند چیلنجز کا سامنا تھا لیکن ہم نے فٹنس، تجربے،کارکردگی، ٹیم کے توازن اور حالات جیسے عوامل کو دیکھتے ہوئے ایک بہترین اسکواڈ کا انتخاب کیا۔ ورلڈ کپ میں افغانستان کی ٹیم اپنا پہلا میچ یکم جون کو دفاعی چیمپیئن آسٹریلیا کے خلاف کھیلے گی۔ ورلڈ کپ 2019 کے لئے افغانستان کا اسکواڈ ان کھلاڑیوں پر مشتمل ہے۔
