کولمبو۔15 اگسٹ(سیاست ڈاٹ کام) جنوبی افریقی کرکٹ ٹیم کو کپتان کی تبدیلی راس نہ آسکی اور کپتان فاف ڈوپلیسی زخمی ہونے کی وجہ سے وطن کیا لوٹے انکی ٹیم جیت کا ہنر ہی بھول گئی۔ آخری دو ونڈے میچز میں شکست کے بعد افریقی ٹیم کو واحد ٹوئنٹی 20 میں بھی ناکامی کا سامنا کرنا پڑا۔میزبان ٹیم کے لئے دنیش چنڈیمل نے عمدہ اور ذمہ دارانہ اننگز کھیل کر کامیابی میں بنیادی کردار اداکیالیکن میچ کے بہترین کھلاڑی کا ایوارڈ اسپنر دھنن جایا کو دیا گیا۔ جنوبی افریقہ کرکٹ ٹیم دورہ سری لنکا کا کامیاب اختتام نہ کرسکی۔ کولمبو میں کھیلے گئے ٹی 20 میچ میں اسے 3 وکٹ کی شکست ہوئی۔ کم اسکور کے میچ میں مہمان ٹیم 17 ویں اوور میں صرف 98 پر ڈھیر ہوگئی۔ وکٹ کیپر کوئنٹن ڈی کاک نے 20 رنز بنائے۔ سنداکن نے 3 ، ڈی سلوا اور دھنن جایا نے فی کس2 وکٹیں لیں،جوابی اننگز میں میزبان ٹیم نے بھی ابتدائی 2 وکٹیں 6 پرگنوادیں اور99 کے معمولی نشانہ تک پہنچتے ہوئے اس کے 7 کھلاڑی آئوٹ ہوئے۔ دینش چندی مل نے نمایاں 36 رنز اسکور کئے ،ڈی سلوا نے 31 رنز کی اننگز کھیل کر ان کا ساتھ دیا۔ شناکا کا فتح میںحصہ 16 رنز کا رہا۔ کاگیسو ربادا، تبریز شمسی اور جونیئر ڈالا نے فی کس وکٹ لیے۔ سری لنکا نے مطلوبہ نشانہ 16 اوورز میں حاصل کرلیا۔ جنوبی افریقہ کی ٹیم ٹسٹ سیریز اور واحد ٹی 20 میچ میں ناکام رہی جبکہ ون ڈے سیریز اس نے 2-3 سے اپنے نام کی تاہم ونڈے سیریز کے آخری دو مقابلوں اور ٹی20 میں واحد مقابلے میں بھی اسے ناکامی برداشت کرنی پڑی۔
