کرنول 17؍جون(سیاست ڈسٹرکٹ نیوز)حضرت سید شاہ اسحق ثناء اللہ ؒ، ایک صاحب کشف وکرامات، علوم شریعت کے جامع اور ریاضت ومجاہدات میں اپنی مثال آپ تھے، آپ بغداد میں پیداہوئے، سلسلہء نسب چودھویں پشت سے حضرت غوث الاعظم دستگیر ؓسے جاملتاہے، آپ کے والد بزرگوار کانام حضرت ابوالفتح سعدالدین تھا،آپ نے18 سال کی عمر تک اپنے پدر بزرگوار کی نگرانی میں تعلیم حاصل کی،اس کے بعد خرقہء خلافت اور نعمت قادریہ حاصل کرکے طریقت وحقیقت کی منزلیں طیٔ کرتے ہوئے اپنی نگاہ فیض سے ہزاروںفرزندان توحید کی ایمانی تشنگی کو دور کرتے رہے۔ آپ عشق الہی میں بغداد سے نکل کر دکن کی جانب تشریف لائے۔برنالہ (پنجاب)کے مقام پر سکونت پذیر ہوئے۔ آپ بغداد واپس ہوکر حسب سنت نبویﷺ نکاح فرمایا، کچھ عرصہ بعد پھر بغداد سے ہندوستان کی جانب عزم سفر باندھا، موضع کنگن پور(کرنول) میں سکونت پذیرہوئے، جو بعد میں قمر نگر ہوا اور اب کرنول کے نام سے جاناجاتاہے۔ ہزاروں لوگ آپ کے ہاتھ پر بیعت کرکے اسلام جیسے پاک ، شفاف وحقیقی مذہب سے آراستہ ہوگئے۔ آخرمیں۹۱۱ ہجری میں آپ نے اپنے معبود حقیقی کو لبیک کہا۔یہ تھے حضرت اسحق ثناء اللہؒ، جنہوںنے خداکے دین کی سرفرازی کے لئے ماں باپ ، خاندان ، قبیلہ ، وطن اور ملک کوقربان کردیا۔
آج بھی شہر کرنول میں مغرب کی دائیں جانب ، حیدرآباد کے رخ پر، گیٹ آف رائلسیماپر، دریائے تنگابھدرا کے کنارہ آپ کا روضہ نور تجلی سے معمور ہے۔روزانہ ہزاروںعاشقان اولیاء آپ کے نور تجلی سے فیض یاب ہوتے رہتے ہیں۔ سجادہ نشین سیدشاہ انورباشاہ قادری عرف تاج محمدقادری کی سرپرستی میں عرس تقاریب منعقد کی جارہی ہے۔۳۰/شعبان المعظم مطابق 18؍جون2015 بروز جمعرات عرس شریف (چراغاں)مقرر ہیں، رات دس بجے فاضل وکامل جامعہ نظامیہ حیدرآباد وسجادہ نشین درگاہ شریف گنگاوتی کرناٹک مولاناسید شاہ خلیل اللہ قادری سیرۃ اولیاء پر تقریر کریںگے، اسکے بعدمحفل سماء منعقد ہوگی، جس میں شہر حیدرآباد سے عالمی شہرت یافتہ قوال اپناقوالی پروگرام پیش کریں گے۔ 19؍ جون2015 بروزجمعہ زیارت کے فاتحہ مقرر ہیں، صبح نو بجے قرآن خوانی ، گل فشانی ، سلام وشجرہ خوانی پیش کی جائے گی، اس کے بعد بدست سجادہ نشین تبرک تقسیم کیاجائے گا۔ سجادہ نشین سید شاہ انور باشاہ قادری وبرادر سجادہ نشین سید شاہ داداباشاہ قادری نے تمام عاشقان اولیاء سے ہمدردانہ اپیل کی ہیکہ وہ ان سہ روزہ محافل میں شرکت فرماکر اولیاء اللہ سے محبت کا ثبوت دیں۔