سڈنی۔25 جولائی (سیاست ڈاٹ کام )اسٹار آسٹریلیائی کرکٹر گلین میکس ویل نے دستاویزی فلم کے ذریعے انہیں اسپاٹ فکسنگ میں ملوث قرار دینے کی کوشش پر سخت غم و غصے کا اظہار کیا ہے۔رواں سال مئی میں ٹی وی چینل الجزیرہ کی جانب سے ایک دستاویزی فلم بنائی گئی تھی جس میں سری لنکا میں پچ فکسنگ کا انکشاف کرنے کے علاوہ انگلینڈ اور آسٹریلیا کے ٹسٹ کرکٹرز پر اسپاٹ فکسنگ کا الزام بھی عائد کیا گیا تھا۔اس دستاویزی فلم میں دسمبر 2016 میں انگلینڈ اور ہندوستان کے درمیان چینائی ٹسٹ میچ کے ساتھ رانچی میں مارچ 2017 میں کھیلے گئے آسٹریلیا اور ہندوستان کے ٹسٹ پر بھی سوالات اٹھائے گئے۔دستاویزی فلم میں الزام عائد کیا گیا کہ ان دونوں ٹسٹ میچوں میں انگلینڈ اور آسٹریلیا کے کھلاڑیوں نے میچ کے مخصوص حصوں میں بیٹنگ کے مقصد کے تحت فکسرز کی جانب سے دیے گئے ریٹ سے رنز اسکور کیے۔تاہم آسٹریلیا اور انگلینڈ دونوں کرکٹ بورڈز نے ان الزامات کو مسترد کرتے ہوئے کہا کہ ان الزامات کو ثابت کرنے کے لیے ٹھوس ثبوت فراہم نہیں کیے گئے۔ہندوستان اورآسٹریلیا کے درمیان جس میچ میں اسپاٹ فکسنگ کے الزامات عائد کیے گئے، اس میچ میں میکسویل نے اپنی پہلی ٹسٹ سنچری اسکور کی تھی۔اس دستاویزی فلم میں دو نامعلوم آسٹریلیائی کرکٹرز کو اسپاٹ فکسنگ کا ذمے دار ٹھہرایا گیا تھا اور رپورٹس کے مطابق ان میں سے ایک کھلاڑی مبینہ طور پر میکسویل تھے اور انٹرنیشنل کرکٹ کونسل کی اس سلسلے میں بڑے پیمانے پر تحقیقات جاری ہیں۔میکسویل نے ایک انٹرویو میں کہا کہ مجھے شدید دھکا لگا، مجھے اس پر بہت تکلیف بھی ہوئی۔ ایک ایسے میچ کے حوالے سے الزامات لگنا جس سے صرف اچھی یادیں وابستہ ہوں، بہت تکلیف دہ ہوتا ہے۔ میں آج تک وہ احساسات نہیں بھولا جب میں اپنی ٹسٹ سنچری کے بعد اسٹیو اسمتھ کے گلے لگا تھا۔انہوں نے کہا کہ اس طرح کے احساسات کو خراب کرنا بہت نقصاندہ ہوتا ہے جبکہ اس کا کوئی ثبوت بھی میسر نہ ہو۔ یہ صد فیصد غلط ہے کہ کسی کی زندگی کے خوبصورت لمحات کو گھناؤنے الزامات لگا کر خراب کیا جائے۔انہوں نے ان الزامات کے حوالے سے کہا کہ اگر الجزیرہ نے میرا نام لیا ہوتا تو ان سے آڑے ہاتھوں سے نمٹتا۔ انہوں نے خصوصی طور پر میرا نام نہیں لیا بلکہ بنیادی طور پر انہوں نے میچ میں جس وقت کا ذکر کیا، اس وقت میں وکٹ پر موجود تھا۔آسٹریلیائی آل راؤنڈر نے کسی بھی قسم کی کرپشن میں ملوث ہونے کے الزامات کو مسترد کرتے ہوئے کہا کہ میں اینٹی کرپشن افسران سے ہمیشہ سچائی سے پیش آیا اور انڈین پریمیئر لیگ میں بھی جب مجھے کوئی چیز مشتبہ محسوس ہوئی تو میں نے انہیں تمام معلومات فراہم کر کے کھیل کو کرپشن سے پاک کرنے کی کوشش کی۔
