لندن۔7 اگسٹ (سیاست ڈاٹ کام) انگلینڈ کے آل راؤنڈر بین اسٹوکس کے نائٹ کلب میں ہوئے جھگڑے کے مقدمے کی سماعت شروع ہو گئی ہے جس میں انکشاف ہوا ہے کہ بین اسٹوکس لڑائی کے دوران اپنا آپا کھو بیٹھے تھے۔گزشتہ سال ستمبر میں اسٹوکس ساتھی کھلاڑی ایلکس ہیلز کے ہمراہ تنازعہ میں ملوث ہو گئے تھے۔بین اسٹوکس برسٹل میں مبینہ طور پر جھگڑے میں ملوث ہوئے جس کے نتیجے میں ایک 27 سالہ شخص کے چہرے پر شدید چوٹیں آئیں اور انہیں دواخانہ منتقل کرنا پڑا۔اس واقعہ کے بعد پولیس نے بین اسٹوکس کو گرفتار کر لیا تاہم تحقیقات کے بعد انہیں بری کردیا گیا تھا۔اس میں انگلش کرکٹر ایلکس ہیلز بھی بین اسٹوکس کے ہمراہ موجود تھے اور انہوں نے بھی مار پیٹ میں آل راؤنڈر کا ساتھ دیا تھا۔ برسٹل کراؤن کورٹ میں وکیل نے کہا کہ اسٹوکس نے بدلے، اشتعال اور سزا دینے کے تحت یہ کارروائی کی اور اس سے قبل بھی متعدد مختلف پرتشدد واقعات میں ملوث رہ چکے ہیں۔وکیل نے کہا کہ یہ تمام افراد برسٹل کے نائٹ کلب میں شراب پی رہے تھے اور 25ستمبر کی رات 2بجے کے بعد یہ جھگڑا ہوا، ان تینوں نے ایک دوسرے پر تشدد کیا اور دھمکیاں دیں۔وکیل نکولس کورسیلس نے کہا کہ جھگڑے کے دوران اسٹوکس اپنے آپے سے باہر ہو گئے اور بدلے، جوابی کارروائی اور سزا دینے کے جذبے کے تحت حملہ کرنا شروع کردیا اور یہ عمل اپنے دفاع یا کسی اورکے دفاع کے عمل سے کوسوں دور تھا۔اس جھگڑے سے ریان ہیل بے ہوش ہو گئے اور پھر انہوں نے کچھ توقف کے بعد ریان علی کے ساتھ بھی یہی سلوک کیا۔علی کو شدید چوٹیں آئیں جس میں آنکھ کے پاس فریکچر شامل تھا اور انہیں علاج کے لیے دواخانہ منتقل کیا گیا۔یہ سنوائی ممکنہ طور پر 5 سے 7 دن تک جاری رہے گی اور اسی وجہ سے بین اسٹوکس ہندوستان کے خلاف جمعرات کو شروع ہونے والے دوسرے ٹسٹ میچ میں شرکت نہیں کر سکیں گے۔
