عرب لیگ کی مذمت، فوری تحقیقات کا مطالبہ
قاہرہ ۔ 23 مئی (سیاست ڈاٹ کام) عرب لیگ نے اسرائیلی جیل میں صیہونی تفتیش کاروں کے وحشیانہ تشدد سے ایک معمر فلسطینی شہری کے وحشیانہ قتل کی شدید الفاظ میں مذمت کرتے ہوئے واقعہ کی فوری تحقیقات کا مطالبہ کیا ہے۔ فلسطینی میڈیا رپورٹس کے مطابق گذشتہ روز عرب لیگ کی طرف سے جاری کردہ ایک بیان میں کہا گیا ہیکہ 53 سالہ فلسطینی عزیز عویسات کا اسرائیلی جیل میں وحشیانہ قتل قابل مذمت ہے۔ عرب لیگ اس واقعہ کے قصورواروں کے خلاف سخت کارروائی کا مطالبہ کرتی ہے۔ بیان میں مزید کہا گیا ہیکہ عویسات پر جیل میں تشدد اور اس کے بعد نام نہاد علاج کی آڑ میں اس کے علاج میں مجرمانہ غفلت کا ذمہ دار اسرائیل ہے جس کے نتیجہ میں فلسطینی شہری کی موت واقع ہوئی۔ عرب لیگ نے صیہونی ریاست کو خبردار کیا کہ وہ فلسطینی قیدیوں کے ساتھ غیرانسانی سلوک کا سلسلہ فوری طور پر بند کرے اور قیدیوں کے عالمی قوانین کے مطابق ان سے برتاؤ کو یقینی بنائے۔ خیال رہیکہ فلسطینی شہری عزیز عویسات کو اسرائیلی جلادوں نے چند روز قبل ایشل جیل میں وحشیانہ تشدد کا نشانہ بنایا اور حالت خراب ہونے پر اسے ہاسپٹل منتقل کیا گیا تھا۔
