نئی دہلی۔9اپریل(سیاست ڈاٹ کام ) آسٹریلیا کی 1992 کے بارسلونا اولمپکس میں سلور میڈل جیتنے والی ٹیم کے رکن رہے گراہم ریڈ کو ہاکی انڈیا نے ہندوستانی قومی ٹیم کا نیا چیف کوچ مقررکیا ہے۔ 54 سالہ ریڈ بنگلور میں ہندستانی کھیل اتھارٹی کے سنٹر میں چل رہے قومی کیمپ سے جلد ہی جڑ جائیں گے۔ وہ اس سال اڑیسہ کے بھونیشور میں ہونے والے ایف آئی ایچ مرد سریز فائنل کیلئے ہندستانی ٹیم کی تیاریوں کا چارج سنبھالیں گے۔ریڈ آسٹریلیا کی ٹیم میں دفاع اورمڈفیلڈرکی حیثیت سے اپنے کیریئر میں کھیلے تھے۔ وہ بارسلونا اولمپکس کی سلور میڈل فاتح ٹیم کے رکن ہونے کے ساتھ 1984 اور1985اور1989اور1990 میں چمپئنز ٹرافی کا خطاب جیتنے والی ٹیم کا بھی حصہ تھے۔130 بین الاقوامی میچ کھیلنے والے ریڈ نے اپنی ٹیم کے ساتھ کوچنگ کا آغاز 2009 میں کیا تھا جب انہیں آسٹریلیائی ٹیم کا اسسٹنٹ کوچ بنایا گیا تھا۔ انہیں اپنی مدت کے دوران ہی ہیڈکوچ بنایا گیا تھا اور انہوں نے 2012 میں آسٹریلیا کو مسلسل پانچویں مرتبہ چمپئنز ٹرافی خطاب دلایا تھا۔ وہ 2014 میں ہیڈ کوچ بنے اور انہوں نے آسٹریلیا کو نمبر ایک ٹیم بھی بنایا۔ وہ2017 میں ہالینڈ کے ایک اہم کلب کے بھی کوچ بنے تھے۔ ریڈ کوکوچ مقررکرتے ہوئے ہاکی انڈیا کے صدر محمد مشتاق احمد نے کہاکہ ریڈ کا کھلاڑی کے طور پر کامیاب کیریئر رہا ہے اور ان کے پاس کوچنگ کا بڑا تجربہ بھی ہے۔ وہ آسٹریلیا اورہالینڈ کی ٹیموں کے ساتھ بھی کام کر چکے ہیں۔ ہمیں امید ہے کہ ان کے تجربے سے ہندوستانی ٹیم کو2020 کے ٹوکیو اولمپکس کے لئے تیاریوں میں فائدہ ملے گا۔ ریڈ نے بھی ہندوستان کا کوچ مقرر کئے جانے کو ایک بڑا اعزاز قرار دیتے ہوئے کہاکہ ہندستانی مرد ہاکی ٹیم کا کوچ بننا میرے لئے بڑے اعزاز اور فخر کی بات ہے۔ اس کھیل میں کسی دوسرے ملک کی اتنی شاندار تاریخ نہیں ہے جتنی ہندستان کی ہے۔ حریف کوچ رہتے ہوئے میں نے ان کے کھیل کا لطف اٹھایا تھا اور اب میری ذمہ داری ہے کہ میں اس ٹیم کو اپنی کوچنگ سے نئی بلندیوں پر لے جاؤں۔
