شارجہ۔15نومبر (سیاست ڈاٹ کام) انٹرنیشنل کرکٹ کونسل نے گزشتہ سال امارات میں شروع ہونے والی پہلی ٹی 10لیگ میں مبینہ میچ فکسنگ کی وجہ سے سری لنکا کے سابق کرکٹر دلہارا لوکوہیٹج کو ابتدائی طور پر معطل کر دیا ہے۔ انٹرنیشنل کرکٹ کونسل کی جانب سے جاری ہونے والے بیان میں کہا گیا ہے کہ ہم دلہارا لوکوہیٹج کو اینٹی کرپشن کوڈ کی مختلف شقوں کی خلاف ورزی پر چارج شیٹ کرتے ہوئے معطل کررہے ہیں۔ یہ خلاف ورزی گزشتہ سال کھیلی گئی ٹی 10لیگ سے متعلق ہیں۔ یاد رہے کہ اماراتی کرکٹ بورڈ کی درخواست پرآئی سی سی نے اینٹی کرپشن عہدیدار کا تقرر کیا تھا۔ جن شقوں کے تحت کارروائی عمل میں لائی گئی وہ میچ فکس کرنے کی کوشش،نتیجے پر اثر انداز ہونے کے اقدام،کسی کھلاڑی کو خلاف ورزی پر آمادہ کرنے اور قواعد کے تحت کرپشن کے بارے میں متعلقہ حکام کو آگاہ کرنے میں لیت ولعل سے کام لینے سے متعلق ہیں۔ دریں اثناء انٹرنیشنل کرکٹ کونسل نے کہا ہے کہ وہ اس مرحلے پر اس حوالے سے مزید کوئی تفصیل نہیں بتائے گی۔آئی سی سی کی اس کارروائی نے ٹی 10 لیگ کے دوسرے ایڈیشن کے انعقاد پر بھی سوالیہ نشان لگا دیا ہے۔ پاکستان کرکٹ بورڈ نے بھی اس لیگ کی شفافیت کے بارے میں سوال اٹھایا تھا اور بڑی مشکل سے اپنے کھلاڑیوں کو اس میں شرکت کی اجازت دی۔ لیگ میں شریک ایک ٹیم کے نام کی تشہیر کو بھی عدالت نے روک دیا ہے جبکہ منتظمین کی جانب سے لیگ کے کچھ میچ پاکستان میں کروانے پر پاکستان سوپر لیگ فرنچائزز نے بھی سخت اعتراض کیا تھا۔
