دبئی ۔24 نومبر (سیاست ڈاٹ کام ) انٹرنیشنل کرکٹ کونسل(آئی سی سی) نے ورلڈ ٹی20 کا نام تبدیل کرتے ہوئے 2020 میں ہونے والے ایونٹ کے لئے نئے نام کا اعلان کردیا۔ آئی سی سی کی جانب سے اعلان کیاگیا ہے کہ ایونٹ کے نام کی تبدیلی کو ناصرف کھیل کو عالمی سطح پر مشہور کرنے کے لئے استعمال کیا جائے گا بلکہ ساتھ ہی کھیل کے اس فارمیٹ کو دیگر دونوں فارمیٹ کی طرح مقام دلانے اور بہتر بنانے کی کوشش بھی کی جائے گی۔ آسٹریلیا میں منعقد شدنی 2020 کے ایونٹ کا نام آئی سی سی مینز ٹی20 ورلڈ کپ اور آئی سی سی ویمنز ٹی20 ورلڈ کپ ہو گا۔ آئی سی سی بورڈ پہلے ہی اس کی منظوری دے چکا ہے کہ تمام ارکان کے درمیان ہونے والے میچز ٹی20 بین الاقوامی مقابلے تصور کیے جائیں گے جس کے بعد ایونٹ میں رسائی حاصل کرنے کے لئے علاقائی ایونٹس کا اعلان کیا گیا تاکہ تمام 104 اراکین کو ٹی20 ورلڈ کپ کھیلنے اور اسے جیتنے کا موقع مل سکے۔ نام کی تبدیلی کا مقصد انٹرنیشنل کرکٹ کیلنڈر میں اس ایونٹ کو اہمیت دینا اور تمام فارمیٹس کی یکساں اہمیت برقرار رکھنا ہے۔ آئی سی سی کی جانب سے نام کی تبدیلی کے اس اقدام کی جنوبی افریقی کپتان فاف ڈیو پلیسی نے کھل کر حمایت کی ہے جو پہلے ہی اعلان کر چکے ہیں کہ 2020 کا ایونٹ ان کے کیریئر کا آخری ایونٹ ہو گا۔ علاوہ ازیں پاکستان کے کپتان سرفراز احمد، ہندوستان کے قائد ویراٹ کوہلی، آسٹریلیا کے کپتان ایرون فنچ اور ہندوستانی ویمنز ٹیم کی کپتان ہرمن پریت کور نے بھی آئی سی سی کے فیصلے کی حمایت کرتے ہوئے اس اقدام کو سراہا ہے۔
