کوالالمپور۔31 جولائی ۔(سیاست ڈاٹ کام) ملائیشیا کے عوام نے ملک کے بیرونی قرضہ جات کی ادائیگی میں اپنا کردار ادا کرنے کے لئے حکومت کی طرف سے قائم کئے گئے ’’امید فنڈ‘‘ میں اس وقت تک 41 ملین ڈالر جمع کروائے ہیں۔ملائیشیا کی وزارت خزانہ کی طرف سے جاری کردہ تحریری بیان میں کہا گیا ہے کہ امید فنڈ کے ساتھ دو ماہ کے عرصے میں عوام سے جمع کی گئی رقوم کی مالیت 41 ملین تک پہنچ گئی ہے۔ وزیر خزانہ لیم گوآن اینگ نے کہا ہے کہ اس بارے میں ہمارا کوئی ہدف نہیں ہے کہ کس قدر رقوم جمع کی جائیں گی تاہم عوام سے حاصل کردہ رقوم کو ملکی مفاد میں استعمال کیا جائے گا۔امید فنڈ 30 مئی کو قائم کیا گیا اور ملائیشیا کے عوام نے صرف پہلے دن میں اس کے لئے 1.76 ملین ڈالر عطیہ کئے۔واضح رہے کہ ملک پر سابق وزیر اعظم نجیب رزاق کے دور سے252 بلین ڈالر خارجہ قرضوں کا بوجھ تھا۔ملک میں بچت تدابیر کے دائرہ کار میں وزراء کی تنخواہوں میں بھی 10 فیصد کمی کر دی گئی تھی۔
